فرصة سعيدة

الاثنين، ديسمبر 19، 2005

أن تكون زوجا

أكثر من ميزة ان تدخل هذا العش الجميل.. الكثيرون يتساءلون: وليه الخنقة .. وآخرون يقولون: وأنا أجيب لنفسي وجع القلب ليه؟.. وأنا أقول ليس فقط الخنقة ووجع القلب بل الخوتة أيضا... أنا الحمد لله سأتكلم براحتي.. ليس لأني لا أخاف من زوجتي لا سمح الله.. ولا لأني شجاع للأسف.. فقط لأني والحمد لله ليس عندي اتصال بالنت في منزلي ... وهذه إحدى فوائد التخلف التكنولوجي .. أن تتكلم براحتك على النت وتقول رأيك في الزواج... ورجاء ومن أجل أطفالي على صديقات زوجتي الامتناع عن أحب شيء إليهن: الوشاية...

نعود إلى السؤال أقول لك عدة ميزات أن تتزوج .. أولا أن تجد من يساندك في أحلك الظروف، بمناسبة "أحلك".. أحد الازواج وهو يموت نظر لزوجته برومانسية شديدة وقال لها: انا لما فُصلت من عملي كنتي معايا ، فهزت رأسها بحنان وموافقة، فأضاف: ولما مرضت وقفت بجانبي، ولما فلست أيضا كنت معايا، والآن وأنا أموت لا تزالين بجواري، مسك يدها بحنيه وقال لها: مش عارف ليه حاسس انك نحس يا حياتي.
من مميزات الزواج أيضا: أن تلبي زوجتك طلباتك .. مثل هذين العصفورين المغردين .. سوسوسوسوسو .. هي كلما رأت زوجها قالت هات لنا أكل .. هات لنا كهربائي.. هات لنا فلوس.. فقال لها: ولا مرة تقولى خذ، قالت: بسيطة يا حبيبي خذ التلفزيون صلحه..
وبالتالي لم يكن منه إلا أن يلبي طلباتها حين قالت له قل لي كلمة تهزني من أعماقي، قال لها: زلزال.. !!!
بالتأكيد هناك زوجات مهملا جدا .. لكن هذا لا يمنع أن ثمة زوجات يبهرن أزواجهن وهذا ما ينعكس على فخر الأزواج بجمال زوجاتهن .. والإشادة بهن في كل موقف.. ونثر الحب كالعبير في المنزل البعض يصور زوجته مئات الصور من فرط إعجابه.. منهم صاحبنا الذي اصطحب زوجته إلى حديقة الحيوان وأصرت على التصوير بجوار القرود ففعل، وعلق الصورة فى الصالون و كتب تحت الصورة : هذه صورة زوجتى مع القرود ملحوظة زوجتى الثالثة على اليمين .
من مشاكل الزواج ألا يتخلص أحد الطرفين من مهنته وينقل سلوكه فيها إلى بيته مثلا مرة واحد مدرس تزوج وزع على المعازيم أرقام جلوس.. والأسوأ منه المأذون الذي لم يجد عملا فطلق زوجته.
ومن أجمل ما في الزواج أن يبنى على الحب رغم ما في الحب من مقالب طفل دخل لأبيه وقال له: قل لي يابابا صحيح الحب أعمى ؟ ... قال له: نظرة لأمك وأنت تعرف .





تنظيم لا بوم


تنظيم لا بوم

الشخصيات : باشا، الضابط مدحت، عسكري


الباشا: ده ورق التنظيم الجديد
- مدحت: أيوة يا باشا
- الباشا: واخباره إيه...
- مدحت: كله تمام يا باشا
- الباشا: مدحت عايزك تركز شوية مش زي أخر 17 تنظيم احنا عاملينهم مكنوش منطقيين ابدا
- مدحت: ايوة يا باشا بس هنعمل ايه مكنش فيه أي تنظيمات
- الباشا: عند حق يعني هنقعد فاضيين
- مدحت: ولا نروح بيوتنا بقى
عسكري: أي والنبي يا ريت يا باشا أحسن بقالي 4 تشهر ونص مشمتش ريحة تراب بلدنا (هيهيهيهي) .. أبو طشت – سوهاج .. اي والله (هيهيهيهيهيه)
- الباشا: على محمد 33 سنة حلواني ... سمير عبده 44 سنة حلواني... خميس زكي 62 سنة (باستغراب) ممم حلواني
الباشا: حلواني حلواني حلواني.. (بقلق) ايه الموضوع يا مدحت
- عسكري: أصله تنظيم زلابية يا باشا .. إي والنعمة آخر حلاوة ... (هيهيهيهههي)
مدحت: (بثقة) .. ياباشا التنظيم فكرته إننا لاحظنا في الفترة الأخيرة إن فيه طابور خامس في البلد ...
الباشا: باهتمام.. حلو قوي ومسكتوا الأربعة اللي قابليه؟
عسكري: لا ياباشا دي طوابير كتير قوي .. اي وعزة جلال الله البلد مليانة طوابير .. بس هما بيقولوا خمسة عشان الحسد .. وعلى رأي الشاعر .. "يغني" سلامتها أم حسد م العين وم الحسد ... هيهيههيهيي
الباشا: وأهداف التنظيم؟
- مدحت: تنمية وتشجيع ثقافة الرفض في المحتمع
الباشا: بثورة يااااه ؟... لأ... تثقيف رفاضة الشجع في التنمية .. لاااا ... ده خط أحمر يا مدحت ..
عسكري:أيوة فعلا يللا برة يا مدحت ... برة عشان الباشا يكمل لعب .. هيهيهيهيهيهي
- مدحت: ايه ده ايه ده...
- اهي .. ؟ مش بيقولك كارت أحمر يا مدحت هيهيهيههي
الباشا: ووسائلهم؟
- مدحت: بيتخفوا ورا شغلهم كحلوانية ويسموا أسماء أوروبية كلها تبدأ بكلمة (لا)... ويخربوا عقول البسطاء ويبثوا بذورهم المريضة في حثالة المجتمع وشراذم الفقراء والمهمشين..
- الباشا: المهمشين؟ !!!
- عسكري: ايوة يعني اللي ساكنين تحت كوبري مهمشة يا فندم (هيهيههيهيه)
- الباشا: واحنا أحسن ناس تقلد ونحب الحاجات الغربية والناس زي البغبغانات ... ها وشمعتوا المحلات؟
- مدحت: طبعا .... لارين
- لا؟ (بهلع)
- لا كازيتا
- لا؟ (بهلع)
- لا بوار
- لا (بهلع)
الباشا: 3 لا .. فعلا ده بيعلموا الناس حاجات أستغفر الله العظيم
مدحت: والأخطر المحل بتاع قائد التنظيم .. (يتمهل) لا بوم
الباشا: هه يعني فيها متفجرات ..
مدحت: شوف بقى انت ياباشا...
الباشا: ولادا ال... وصولا أنهم يغرروا بيا...
مدحت: فعلا يا باشا..
الباشا: الأندا خدعوني لغاية ما وصلوا لغرضهم..
مدحت: هو الموضوع وصل لكدة؟
الباشا: وأكتر...
عسكري: وين هنادي يا اماي ... هيهيهيهي
مدحت: يا باشا اللي انكسر يتصلح
الباشا: مش ممكن أبدا..
مدحت: لالا ممكن انا أعرف دكتور كويس قوي للحاجات الوسخة اللي زي كدة ..
الباشا : انت افتكرت ايه أنا حزين لاني كنت متعود
مدحت: أنا فهمت ياباشا... خلاص
الباشا: متعود أشتري منهم.. وأجرمت في حق بلدي.. سامحيني يا بلدي.. سامحيني يا بلدي..
عسكري: بلدي هي أمي .. ترعتها بتجري في دمي.. حتى لوني كحلي.. لون السحابة السودا... (هيهيهيهيهي)
الباشا : بس فيه مشكلة جامدة في فكرة التنظيم ..
مدحت: خير يا فندم؟...
الباشا: هو احنا عندنا حد يستجرا يقول لا يا مدحت .. (بحزن) كدة الفكرة الجميلة دي هتضيع...
مدحت: هو .. أأأ ... يعني ... أيوة عندي فكرة ياباشا .. معظم أوربا ضد أمريكا دلوقتي ايه رأيك لو نقول إن العيال دول قابضين من فرنسا وألمانيا عشان – لا مؤاخذة - يهاجموا ويحرضوا ضد دولة يعني صديقة وكدة
الباشا: أمريكا.. ؟
مدحت: هو فيه أصدق منها ياباشا؟
الباشا: برافو برافو يا مدحت .. يا ابن الإيه .. والموجة دلوقتي للتنزيمات العالمية .. روح غير ملف القضية بسرعة .. وانا هتصل بالباشا الكبير...
- عسكري: يا باشا والنبي ليا عندك طلب .. زي ما خدتوا الحلاونية .. اعملوا قضية لبتوع الفراخ عشان كيلو الفراخ البيضا بقى ب 11 جنيه .. والسماكين والحلاقين والترزية وبتوع السماد (هيهيهيهيهي)