فرصة سعيدة

الاثنين، أغسطس ٢٨، ٢٠٠٦

كراسة تسع تسطر

في المدرسة كانت فيه بنت اسمها هدير، ورغم إن مامتها كانت شيك وأبوها كان مهندس إلا أن شعرها كان أكرت وكنت بستغرب قوي إن فيه بنت شعرها أكرت\، مكنتش بحب أكلمها .. كنت دايما حاسس إن البنات المفروض يكونوا شبه وسام بنت أبلة نادية .. كان شعرها ناعم جدا.. انا كنت بحبها رغم إني بعد كدة اكتشفت إن عينيها ضيقة زيادة عن اللزوم لدرجة إنها مش جميلة بالدرجة اللي كنت باشوفها فيها وانا في سنة تالتة ... فضلت أحبها طول تالتة ورابعة ولما راحت خمسة رابع وأنا خمسة أول نسيتها شوية لأن خمسة أول كانت في الدور التاني في مبنى اتنين وخمسة رابع كانت في الدور الأول في المبنى الرئيسي .. والمدرسة لانها كانت زحمة جدا فكنا بناخد الفسحة كلمبنى لوحده، وأنا كمان كنت في سنة خامسة دي مشكويس اتصاحبت على عيال وحشة قوي إميل وحمادة القزعة، ومحمد عبعليم ، المهم في سنة ستة قربنا من بعض ستة أول بتاعتي بينها وبين ستة رابع فصلين بس وكنت دايما أحاول أروح عندهم أستلف طباشير، أجيب عصاية للأستاذ أي حاجة، رغم إني أصلا مكنتش بحب ألعب دور صبي الأستاذ ده بس كنت بحب أشوف وسام ...

6 تعليقات :

  • تصدق.. أنا كمان كنت بحب بنت في سنة خامسة.. كان اسمها منة، وكانت أمورة قوي.. رغم اني شفتها من سنتين واكتشفت ان عندها (ضب) يعني وشها طالع لبرة كدة وبيخوف في الضلمة ...

    ساعتها كنت ببعت أخويا الصغير اللي كان في الحضانة في نفس مدرستنا عشان يتكلم معاها ويصاحبها وبعدين خليته يقولها إني أخوه واتصاحبت أن عليها وفكرنا في يوم نزوغ من المدرسة وزوغنا فعلا بس كل واحد لوحده (هي دي الصياعة)

    بس أول ما سنة خامسة خلصت.. كان لازم "نسيب" بعض.. مع اننا ممسكناش بعض أصلا.. بس اللي حصل إن هي اتحجبت.. وإدارة المدرسة فصلت البنات في مدرسة لوحدهم.. أما أنا.. فجبت ملحق انجليزي في السنة دي.. وكنت مقتنع إن ربنا عاقبني بالملحق ده عشان كنت بحب منة.. ولإن الحب حرام.. أصل أنا كنت حلم بيها بالليل وكنت فكر فيها وأنا بصلي.. وعشان كدة كان لازم أسيبها عشان معملش حاجة حرام وأبطل اسقط في الامتحانات..

    فكرتني بالذي مضى.. شكرا يا أحمد

    كتب Blogger البراء أشرف, في ٢:٥٦ ص  

  • أول لما نويت أعلق كنت ناوي أكتب أن أحلى حاجة في التدوينة هي العنوان، بس لقيت أن التدوينة كلها عجبتني وخصوصا الحتة بتاعت انك مكنتش بتحب تعمل دور صبي الاستاذ .. يمكن علشان انا عمري ما حبيت الدور ده وياما حصلي مشاكل بسبب الحوار ده

    كتب Blogger dead man, في ٥:٤٥ م  

  • كلام جميل راجعني لايام ابتدائي, لما كان الواحد امل حياته يقف عالفصل..............

    كتب Anonymous غير معرف, في ٢:٣٧ ص  

  • اول مرة ازرو المدونة كنت لسه هبتدي الف فيها مقدرتش اقاوم العنوان
    ياااه الكراسه ال9 اسطر رجعتني صغننه جدا
    التدوينة كلها جميله ونقدر بسهوله نشوف نفسنا فيها انا كمان كان عاجبني ولد في تانية ابتدائي كان شعره اصفر وعنيه ملونة وبعدين اكتشفت انه غلس وبليد كمان وان في ناس تانية مش ملونة ومبهرة زيه كده لكن ممكن تتكلم معاهم وتلعب من غير ما تحس انك مخنوق

    كتب Blogger كراكيب نـهـى مـحمود, في ٩:٢١ م  

  • حسبي الله ونعم الوكيل

    كتب Blogger منبري, في ٨:١٠ م  

  • بحبك اوووووووووووووووووى

    كتب Anonymous غير معرف, في ٥:٤٢ م  

إرسال تعليق

<< الرئيسية